ТТС «Protector AI» жобасын таныстырды

«Транстелеком» АҚ білім беру ұйымдарында қауіпсіздікті арттыруға бағытталған Protector AI цифрлық шешімін ұсынды.

Protector AI - буллингтің алдын алуға және қауіпсіз білім беру ортасын қалыптастыруға арналған жасанды интеллект жүйесі. Шешім бейнебақылау камераларынан алынған деректерді талдап, ықтимал қауіптерді автоматты түрде анықтайды.

Жүйе келесі жағдайларды анықтауға мүмкіндік береді:

-агрессия, төбелес және буллинг белгілері;

-оқушылардың эмоционалдық жағдайындағы өзгерістер;

-күмәнді әрекеттер мен тәртіп бұзушылықтар;

-шектеулі аймақтарға кіру фактілері.

Анықталған оқиғалар туралы ақпарат жауапты тұлғаларға жедел түрде жеткізіледі (мобильді қосымша, Telegram-бот және жеке кабинет арқылы).

Қазіргі уақытта жоба Қостанай облысындағы білім беру мекемелерінің бірінде пилоттық режимде іске асырылуда. Болашақта шешімді басқа оқу орындарына енгізу жоспарлануда.

Аталған шешім QOSTANAI TECH ғылыми-инновациялық іс-шарасында ұсынылды.